| | 老豆：
好懶，原來超過一個月無寫幾隻字比你喇。
最近，或者係偶有巧合，發生左幾件（大）事，令我地幾個都有一 d 新o既經驗、體驗。
有時我覺得，呢 d 野可能係你安排o既，o係你唔o係我地身邊o個時候，你用唔同o既方法俾我地去成長，有更好o既條件去照顧屋企，照顧身邊o既人。
o係屯門公路壞車o個一刻，幸好我無好慌亂，打左 1/2 個自己應該打o既電話，而且好快已經有交通警到，當一切稍稍平定落黎，腦入便諗起o既係亞弟話過，佢有一次夜晚爆呔，第一個就打俾你，你即刻就幫佢叫拖車，打俾整車o既人；諗到呢度，我都會唔開心，因為我都好希望可以有咁o既機會，o係壞車o既時候可以打個電話俾你，繼續得到你o既照顧... 不過你知嘛，而家你唔o係我地身邊，我地都好努力，慢慢識照顧自己，去面對唔同o既情況... 過程或者係會難架，不過希望唔駛令你擔心喇。
囡囡呢，又自己同個同學去左旅行，去成 2 個星期，最擔心就梗係亞媽，唔放心呢個大頭蝦喎。你問我，我就梗係話咩都要俾佢自己去處理喇，幸好呢次佢有交帶好多喇，每日都有打電話返黎，我見亞媽都開心o既（雖然你知就算下次再有同樣情況佢都係唔放心架喇，你老婆係緊張大師嘛  ），我自己最希望係，既然呢次算係佢畢業旅行，都希望佢可以得到一個難忘o既歷程同經驗，慢慢唔好再咁「三公主」啦...
老豆呀，究竟你而家o係邊呢？可能睇得戲多，我有時覺得，可能我打緊字呢一刻，你就企左o係我後便...
賢
* * * * *
後註：早寫好了，原來忘了登出來...
|
| | Posted 6/10/2008 11:48 PM - 8 Views - 0 eProps - 0 comments
- recommend
  - recs0
- share
- email
 - sent0
|
